Мақалада терроризмге қарсы халықаралық-құқықтық күресте туындайтын этикалық және құқықтық дилеммалар қарастырылады. Зерттеудің өзектілігі терроризм қаупінің ғаламдық сипат алуымен және антитеррористік шараларды жүзеге асыру барысында адам құқықтарын сақтау қажеттілігімен айқындалады. Халықаралық құқықтық актілер, жекелеген мемлекеттердің тәжірибесі және халықаралық соттардың шешімдері талдана отырып, қауіпсіздік мүдделері мен жеке тұлғаның негізгі құқықтары арасындағы қайшылықтар анықталды. Зерттеудің мақсаты қауіпсіздікті қамтамасыз ету шараларының тиімділігі мен халықаралық адам құқықтары стандарттарын сақтаудың оңтайлы теңгерімін табу болып табылады. Жұмыстың жаңалығы салыстырмалы-құқықтық талдаудың кешенді жүргізілуінде көрініс табады. Практикалық маңыздылығы – алынған нәтижелерді заңнаманы жетілдіруде және құқық қолдану тәжірибесінде пайдалану мүмкіндігі.